كان فيه أم لثلاث بنيات يتيمات فقيرات..يوم من الأيام وكان يوافق يوم جمعة طق عليهم الباب رجال كبير في السن أحدب الظهر وقال: أبي أحط عندكم وديعة قرعة مليانة بالدبس وبروح أصلي وبعد الصلاة بجي أخذها. الأم وافقت وخذتها ودخلتها في المطبخ..ولهت في بيتها لكن اللي صار أن البنت الكبيرة راحت وشافت قرعة الدبس وما مسكت نفسها وصارت تلحس في هالدبس..شوي وتلحقها الوسطى وبعدين الصغيرة وما وقفوا إلا لما خلصت. الرجال رجع بعد الصلاة وطق الباب يبي قرعته ويوم شافها وإلا الدبس مخلص..صار يطق على الباب ويقول "عطيني قريعة الدبس ولا حدا بناتك".
الأم ما كان لها خيار وكان شكله يخوف وعرفت أنه ما راح يخليها هي وبناتها فزوجته الكبيرة..طلعت البنت بعد ما جهزوها مع هالرجال ومروا في الطريق على عجوز قالت لها: عطيني من كحلك وطيبك وأعلمك علم يسرك. لكن البنت ردت: أنا بروح لدار الشخت والبخت.وما عطت العجوز شئ.
وصلت البنت لبيت الرجال وتلقاه مليان حشرات, قال لها الرجال: هذولي عيالي أكرميهم وأحشميهم وقومي بالواجب..البنت ماسمعت كلام الرجال وصارت تحاول تقتلهم وتبعدهم. بعد ثلاث أيام نادى الرجال ياعيالي يقصد الحشرات تبون أمكم ذبيحة ولا مليحة. قالوا:لا ذبيحة ذبيحة.
فقتلها وخلاهم يأكلون لحمها ويشربون دمها .. رجع الرجال لأم البنات وطلب نفس طلبه "عطيني قريعة الدبس ولا حدا بناتك" وصار يردد هالطلب الأم كانت ضعيفة وما بيدها خيار إلا ترضخ لطلبه وزوجته بنتها الوسطى وحصل للبنت الوسطى نفس ما حصل لأختها الكبيرة قابلت العجوز في الطريق ورفضت تعطيها من كحلها وطيبها علساس أنها بتروح لدار الشخت والبخت.
ولما دخلت البيت حاولت تأذي الحشرات وتقتلها وبعد ثلاث أيام سأل الرجال عياله ذبيحة ولا مليحة فردوا: ذبيحة ذبيحة وقتلها وكلوا لحمها وشربوا دمها.
رجع مره ثالثة وطق الباب على الأم وقالها: "عطيني قريعة الدبس ولا حدا بناتك" الأم ما ببيدها حيلة لكن البنت الصغيرة قالت لأمها أدعي لي وأنا بروح معه لا يسوي لك شي..راحت البنت الصغيرة مع الرجال وقابلت العجوز وطلبت منها نفس الطلب: عطيني من كحلك وطيبك وعلمك علم يسرك..البنت أعطتها من الطيب والعطر فقالت لها العجوز عن مصير خواتها وأن هالرجال مهب آدمي فبتروح معه وتشوف بيته كله حشرات لازم تكرمهم وتحشمهم عشان ما يقتلها بعد ثلاث أيام, وأعطتها دواء تحطه في أكله وأكل الحشرات.العجوز ماقصرت مع البنية حتى أنها علمتها أنه غني عنده ذهب وكنوز بعد ما يموت هو حشراته تأخذهم.
البنت الصغيرة سمعت كلام العجوز فحشمت الحشرات والرجال وأكرمتهم وبعد ثلاث أيام سأل عياله : تبونها ذبيحة ولا مليحة..قالوا: مليحة مليحة.
فخلها وما قتلها, فحطت الدواء في أكله وأكل الحشرات مثل وصتها العجوز. وبعد ما مات وماتوا عياله راحت لمخازن الذهب والكنوز وشالتها وراحت لأمها وتغيرت حالهم وعاشوا وبعد سنين عمرهم ماتوا.وصلى الله على نبينا محمد.
دَولتيّ
مَزآجي
مشآركآتيَ
نقاط التميز »
عمريّ
سّجلت فيَ
الجِنسْ
موضوع: قريعة الدبس ولا حدا بناتك 2014 
الإثنين مايو 12, 2014 1:39 pm
