Ramy Osman
عضو فعال
 دَولتيّ : 
 مَزآجي : 
 مشآركآتيَ : 130
 نقاط التميز » : 391
 عمريّ : 26
 سّجلت فيَ : 11/05/2014  الجِنسْ : 
 |  موضوع: عرء المراسي 2014  الإثنين مايو 12, 2014 1:42 pm | |
| كان ياماكان، لحتى كان، منحكي يمّا منّام، يمّا منتذكر النبي ألف الصلاة عليه والسلام.
كان بزمانه ملك بده يروح عالحج، وعنده بنت شو مدلعها ومكرمها..
راح لبنته وآل إلها: شو بتريدي يابنتي هديه أجيب إلك.
آلت إله: يابي ما أريد غير تروح وتجي بالسلامة.
آل إلها: مابصير..شو قيمة الغايب بلاهدية شو بتريدي يابنتي قالت بفكر وأرد لك..
أحتارت شو بتريد شو بتريد..آلت لأسأل الأوسطة وبعد ماسألت الأوسطة قالت لها:
آولي له يجيب إلك عرء المرسي. وإن جابه إلك تتحمل حماله وتتيسر جماله !! وإن ماجبت لي عرء المراسي تتقطع حباله وتبرك جماله !!
وعلى كف الرحمن..واتكل على اللي عينه لا تغفل ولا تنام، راح حج ولبى، وطاف وسعى بأمان الله وبعديه راح لمدينة الرسول صلى الله عليه وسلم..
وهاي الزلمه راح يجيب الهدايا وفي باله عرء المراسي وبعد ماسأل البياعين لآله عطار عنده عرء المراسي..أعطاه أشي في علبه..أستغرب الملك من هاي الهديه وميشيوا فزت الجمال..وأنشدت الحبال..
وبفضل الله وبحمده وصلوا.. واندقت المكاتيب طلعوا العراضين وقامت الأفراح وتوزعت الهدايا والهبات..
وبلش الملك يوزع على أهل القصر ونده لبنته: تعالي يابي هاي العلبة الفاضية اللي وصيتني عليه.
راحت البنت وفاتت على غرفته، وحطت راسها وتسطحت ونامت ونامت..
وما صحيت إلا بها الشب اللي بيقول للقمر غيب لاقعد مطرحك قاضي ومفتي ونقيب...
آلت له:
دخلك أنت مين!! أنت أنسي ولاجني!!
آل إلها: أنتي يلي بعثتيني من بلاد الح
وقعدت وياه وحكوا وانبسطوا ولما جهجه الضو..غط هالشب في العلبه وماعاد بين..
لما صار ثاني فزت هالبنت وكانت غير عن كل يوم.. انتبت لها الجارية وقالت شو ياللي فيها ؟؟ شو ياللي غيرها؟؟
ولما صار المسا فاتت البنت على غرفتها وصار مثل البارح.
لكن الجارية قررت تشوف شو ياللي صاير.. حطت السلم من هون والشب ظهر من العلبة من هون
وصار مثل انبارح وعلى صياح الديك جهجه الضوء ودعوا بعضهم..وغط هالشب في العلبة وماعاد بين
ولما صار العصر وراحتت البنت تستحم دخلت على غرفتها وجابت ثالث قنينات أزاز وكسرتهن ودقت الأزاز
لحتى صاروا مثل الكحل الناعم .حطتهم تحت العلبة وطلعت بأمان الرحمن.
ولما رجعت البنت لغرفتا ظلت تنتظر ولماظهر الشب ويتبعثر في الإزاز وصار الدم في كل مكان.
وماعاد طلع حتى الصبح..ثاني يوم كمان ماعاد طلع
وهالبنت صارت أشباح بلا أرواح..
شافتها الملكة أمها آلت: ياملك الزمان هالبنت مادري شو باها ضعفانه.
سأل الملك البنت: يابنتي شو باكي؟ شو صاير معاكي؟
آلت له: يابي مابدي منك شي، إلا تفتح لي حمام، وتطالع منادي ينادي بهالبلد: إيمن بده يتغسل، يحكي لي لي حكاية عواض الوفا.
نادى ملك الزمان على وزيره وآل له: ياوزيري ابني لي حمام وافرشه واطقمه..أحسن شي عميل فيه.
آل الوزير: ياملك الزمان حاضر وتمام.
وبظرف الليل من الأيام هالدراهم مثل المراهم حطها على الجرح بيطيب، تعمر هالحمام ونادى المنادي : أيمن بده يجي على الحمام على حساب بنت الملك وعواض الوفا حكايه.
وصارت الأوادم تيجي هاي تحكي حكاية وهاي تئول سيره وصل صيت الحمام لكل ضيعه وفي وحده منهن ندهت على صاحبتها وآلت لها عن الحمام بس صاحبتها آلت مابعرف أحكي!!
لكن صاحبتها أصرت وآلت: احنا مابنوصل إلا بكرا ومن هون لبكرا بنئول لها ع حكايتنا وشو صار معنا
صار عملوا أكلهن وعلى أذان الصبح مشيوا ومشيوا سبحان ربي هو العالم فيهن.
ولما غاب الضو وصارت العتمه آلت وحده فيهن:
يي ياأختي، شو بدنا نعمل؟ تعي نقعد بكعب هالجوزه لحتى يكشف الضو
ولما حطوا وقعدوا بكعب هالجوزة، ماشافوا إلا الأرض انشقت ويسمعوا يامكنسين كنسوا، يارشاشين رشوا، هالأرض تكنست وارتشت وانتصبت هالكراسي.. ويطلع شب مثل الوردة لكنه عليل ياحسرتي كله جروح وقطن وصار يئول:
عرء المراسي ياعرء المراسي
آه شو قلبها علي قاسي
ياترى حطت لي الأزاز قلبها ناسي
دقت لي الأزاز لحتى وجعني راسي
حط هالمحرمه على عيونه، وصار يبكي ويبكي..
هون آلت له صاحبتها: أختي هاي الله بعث لنا حكاية، منحكيها لبنت الملك، شو رايك؟
آلت لها التانيه: ايه نحمد لله..
وعأذان الصبح وجهجة الضو مشيوا حتى وصلوا وصار ميعاد الحمام، فاتوا عالحمام
بعدين صاروا عند بنت الملك آلت لهن شو حكايتكن سمعوني
آلوا بنحكي لك شو صار فينا بهالطريق..طلعنا من الضيعة ولما صارت الدنيا عتمه. قعدنا بكعب جوزة ومانشوف إلا انشقت الأرض وطلع منها، بسم الله الرحمن الرحيم، وآل يامكنسين كنسوا ويارشاشين رشوا.
هالمكنسين كنسوا وهالرشاشين رشوا، وطلعت هالكراسي ومانشوف إلا ظهر شب من صفاته من حلالته بيئول للأمر غيب لأقعد مطرحك قاضي ومفتي ونقيب.. لكنه عليل ياحرام الشوم وكله جروح وقطن وصار هالشب يئول:
عرء المراسي ياعرء المراسي
آه شو قلبها علي قاسي
ياترى حطت لي الأزاز قلبها ناسي
دقت لي الأزاز لحتى وجعني راسي
بعدين هالزلمه غط وماعاد بيّن
بنت الملك هون آلت: دخلك بتعرفي تاخذيني لهاديك القرنة؟ آلوا لها: أيه
بنت الملك قامت وعطتهن من هالخيرات ومن هالأكراميات اللي عنده.
أخذوها ومشيوا ومشيوا لحد ماوصلوا لعند كعب الجوزة
ولهون طلبت منهن بنت الملك يتيسروا..تيسروا وهي كانت ماخذة معها عدة الدكتور روب أبيض، شنتاية، شاش وقطن..
ولما غاب الضو وصارت العتمة..شافت متل ماآلوا له.
مكنسين ورشاشين وانتصب الكراسي ولما ظهر الشب وشافته هو بذاته وبعد ماخلص الدء والغنى والكل راح وماظل إلا هو ظل يبكي وينوح ويئول:
عرء المراسي ياعرء المراسي
آه شو قلبها علي قاسي
ياترى حطت لي الأزاز قلبها ناسي
دقت لي الأزاز لحتى وجعني راسي
ولما خلص وصار بدوا ينزل لتحت الأرض نزلت معاه بقفاه وصار هو ابن ملك العجم..
بعد مانزلت وعالصبح صارت تنادي تحت الأرض أنا الطبيب اللي بإذن الله أداوي..أنا الحكيم اللي بإذن الله أداوي
جاته جاريه وآلت له: سيدي مريض ومابنعرف شو به لا يحكي ولا بيرد!!
راحت لعنده بنت الملك وشافته وفتحت الشنتاية وآلت لهم احموا لي الحمام وحضروا المغطس وتركوني ساعة زمان.
حموا الحمام وحضروا المغطس وظلت تنظف الإزاز من جروحة بالمايّ وتحط الأدوية والمراهم بعدين طالعته عالتخت تنشط شوي وشربته زبدية شوربه
أول يوم وتاني وتالت وبفضل ربي طاب الشب..
لما طاب وصحي آلت لها أمه الملكة: اتمنى يادكتور شو بدك..
آلت بنت الملك: طالعوني على وش الأرض واعطوني منديل الأمان وغير هيك مابدي
صار وطالعوها واعطوها منديل الأمان ورجعت البنت لقصر أبوها.
وعلطول فاتت لغرفتها وظلت ترتبها..
ومرت كم ليله وفي وحده منهن ظهر الشب وفي أيده سيف وعم بيئول: ياخاينة بدي أقطع راسك..
مدت له أيدها وشاف منديل الأمان عرفها وبدل مايقطع راسه شكرها..
وحكت له حكايتها من دء دء لسلام عليكم.
إلهي ياحق تجمع شمل كل مشتاق بيلي إله فكر فيه
ودشرناهم باللذة والنعيم..طيب الله عيش السامعين..آمين يارب العالمين..
| |
|
